Í dag eru 39 ár frá því að Samhjálp var formlega stofnuð. Aðdragandinn er falleg saga sem minnir  á söguna um miskunnsama Samverjann.  Meginmarkmið Samhjálpar er að koma þeim til hjálpar sem lotið hafa í lægra haldi fyrir ógnarvaldi áfengis og annarra vímuefna. 

Starfið byrjaði á götunni þar sem gegnið var til þeirra sem lifðu útigangslífi, kropið við hlið þeirra og þeim hjálpað til að verða edrú.  Fyrsta starfstöðin var í bílskúr sem Steingrímur fisksali og Kristín kona hans áttu á Sogaveginum og þar fékk Georg Viðar, frelsaður maður, aðstöðu til að hjálpa meðbræðrum sínum.  Hann leitaði á náðir Einars Gíslasonar prests Hvítasunnusafnaðarins, sem brást ljúfmannlega við og koma hann því til leiðar ásamt öðru góðu fólki að Hlaðgerðarkot var keypt af Mæðrastyrksnefnd Reykjavíkur, sem áður hafði verið þar með barnaheimimli. 

Formleg stofnun Samhjálpar var þennan dag 31 janúar á 50. afmælisdegi Einars.  Hann gaf allar afmælisgjafir sínar til Samhjálpar. Mikið vatn hefur runnið til sjávar frá þessum tíma og mikið vín hefur líka i runnið af mörgum sómakærum körlum og konum sem átt hafa fyrstu skref  sín til frelsis í Hlaðgeðarkoti.  

Starf Samhjálpar hefur stækkað og eflst. Meðferðin hefur tekið tekið miklum stakkaskiptum og er meðferðarstarfið nútímalegt sem byggir á hefðbundinni áfengismeðferð og menntuðu starfsfólki. AA fundir og hugmyndafræði AA-samtakanna eru líka ríkur þáttur í meðferðinni.

Samhjálp á gott  samstarfi við  Velferðarráðuneytið og Reykjavíkurborg.  Ásamt Hlaðgerðarkoti rekur Samhjálp fjögur áfangaheimili, Gistiskýlið og Kaffistofuna.  Viðkoman hjá Samhjálp er gríðarlega mikil.  Í nótt sváfu um 110 manns í rúmum sem Samhjálp bjó um og í dag munu um 100-110 manns njóta matarins á Kaffistofunni.  Félagsstarf Samhjálpar í Stangarhyl 3 er líka mjög öflugt bæði hjá U.N.G. á sunnudögum  og á Samkomunum sem eru á fimmtudögum. Þá kemur þangað mikill fjöldi karla og kvenna í viðtöl.

Samhjálp á sér hauk í horni sem er Styrktarfélag Samhjálpar. (reikningsnúmer er 101-26-31880, kt 690104-2880). Það sér um blaðaútgáfuna, happdrættið, Nytjamarkaðinn, merkjasölu, dagbókarsölu, hljómdiskasölu og annast hvers kyns fjáraflanir.  Nú er merkjasalan að hefjast og hvet ég sem flest til að koma upp í Stangarhyl 3, sækja merki og selja í þágu Samhjálpar.

Nú eru þessi 39  ár að baki.  Á komandi ári munum við leita til þjóðarinnar um að hjálpa Samhjálp til þess að komast út úr miklum skuldum og einnig til þess að endurbæta Hlaðgerðarkot. Draumurinn sem við eigum er komast út úr þeirri miklu hættu sem stafar að Samhjálp vegna mikilla fjárhagserfiðleika.  Ég heiti á þig lesandi minn góður  að leggja Samhjálp lið í þeirri baráttu í lífróðri Samhjálpar.

Með bestu afmæliskveðjum.

Karl V. Matthíasson, framkvæmdastjóri Samhjálpar.

2011- 2012 - 2013

Samhjálp óskar landsmönnum öllum  blessunar og friðar á árinu 2012.   Allir dagar ársins 2011 eru liðnir,  horfnir í aldanna skaut,  en minning  þeirra lifir.  Minningar sem mörgum eru erfiðar, fullar af sorg og jafnvel ósigrum . Aðrir munu horfa til ársins 2011 með  blik í auga vegna þess að dagar þess gáfu þeim gleði og sigra.  Það eru góðar minningar.

Samhjálp sér á hverju ári mikla og glæsilega sigra en verður einnig að lúta höfði  vegna  ósigra og vonbrigða sem fylgja  sjúkdómum  alkahólisma, sem kalla má sjúkdóm  sorgar og vonbrigða.

Á hverjum degi er hönd Samhjálpar útrétt  til fjölmargra sem líða vegna alkóhólisma og gleðilegt er að sjá hversu  margir geta komist frá þeim ógnum sem áfengisbölið er. 

Starf Samhjálpar byrjaði smátt . Í fyrstunni var það í bílskúr og þaðan fór það upp i Hlaðgerðarkot og svo kom Kaffistofan,  samkomuhaldið,  rekstur Gistiskýlisins og nú eru starfsstöðvarnar orðnar 8 og gríðarlega mikil viðkoma er hjá  Samhjálp í dag.  Á hverri nóttu sofa 106 manns i rúmum sem Samhjálp hefur búið um ef svo má að orði komast.

Eftir eitt ár mun Samhjálp halda upp á 40 ára afmæli sitt.  Viðfangsefni Samhjálpar á þessu  nýja ári, 2012 verður að koma fjármálunum í gott horf eftir  erfiðleika, sem steðjað hafa að vegna kreppunnar sem bitið hefur.  Samhjálp er alltaf vongóð. Nú standa yfir viðræður við Landsbanka Íslands og treystir Samhjálp á  yfirlýsingu bankans um nýjan sáttmála við þjóðina um samfélagslega ábyrgð. Ef vel gengur í þeim samningum verður mun auðveldara að sinna öllu því veika fólki sem til Samhjálpar leitar.

Á árinu 2012 horfir Samhjálp  einnig til þess að safna fyrir miklum endurbótum á Hlaðgerðarkoti og bæta aðbúnað allan fyrir skjólstæðinga sína. Þess vegna mun Samhjálp nota þetta ár til öflugri fjáraflana en verið hefur.  Það átak köllum við Lífróður Samhjálpar.

Samhjálp stígur óhrædd um borð til þessa róðurs því hún nýtur velvildar og elsku í samfélaginu vegna grundvallar hjálparstarfs síns, meðferðar og annars stuðnings, sem er fjölþættur.

Eftir því  sem starf Samhjálpar eflist  þeim mun öflugra verður samfélag okkar.  En í öllum þeim körlum og konum sem berjast við alkahólismann og fá bata býr gríðarlegur máttur og kraftur,  sem getur virkjast til góðs, blessunar og friðar fyrir þau sjálf,  fjölskyldur  þeirra, og samfélagið  allt.    Leggjumst á árar og róum á lygnan sæ gjöfulla miða.

Samhjálp þakkar innilega öllum þeim sem lagt hafa starfinu lið í smáu sem stóru og biður Guð að blessa þau öll í lífi og leik.  Samhjálp þakkar einnig öllum skjólstæðingum sínum góða samleið og vináttu og biður þeim Guðs blessunar.