Jólastemning á aðventukvöldi Aglow

Næstkomandi mánudag 1. desember halda Aglow samtökin á Íslandi aðventukvöld í félagsheimilinu í Garðabæ. Séra Guðmundur Karl Brynjarsson flytur hugvekju og samkomugestir syngja eingöngu jólalög. Og auðvitað verður tertuhlaðborðið á sínum stað.  Þetta er árlegur viðburður og á hverju ári fer fram söfnun til styrktar góðu málefni og að þessu sinni var samþykkt að safna fyrir Hlaðgerðarkot.

Samkoman hefst klukkan 20 en fyrir þá sem ekki þekkja er rétt að segja frá að Aglow International er þverkirkjuleg hreyfing kristinna kvenna sem starfar í yfir 170 löndum í sex heimsálfum. Konur innan samtakanna starfa af hugsjón og með kærleika að leiðarljósi enda hefur starf þeirra snert líf milljóna manna og kvenna af ólíku þjóðerni í margskonar menningarheimum. Bæn og trúboð eru tveir grundvallarstólpar hreyfingarinnar en hún varð til árið 1967 í Seattle í Bandríkjunum.

Upphalfegu meðlimirnir voru fjórir og konurnar vildu biðja saman og eiga trúlegt samfélag. Hópurinn stækkaði ört og þarna hittust konur úr öllum kirkjudeildum, sem tilheyrðu ólíkum stéttum og mismunandi menningarheimum. Starfið spurðist út og fljótlega urðu til samskonar hópar víða um Bandaríkin, fyrsti hópurinn utan þeirra var stofnaður í Kanada, næsti í Nýja Sjálandi, þá í Hollandi og í dag starfar Aglow í öllum heimsálfum og meðal fjölbreyttra þjóða. Aglow á Íslandi hóf starfssemi árið 1987 og nú starfa hér sex Aglow hópar.

Markmið Aglow er að virkja konur í Guðs ríkinu, hjálpa þeim að breyta lífi sínu og hafa áhrif á umhverfi sitt. Konur á öllum aldri og af öllum menningarstigum eru snertar af kærleika Krists sem skín í gegnum útrétta hönd Aglow, og þær hafa víða áhrif, t.d.  í fátærkahverfum, á vinnustöðum, í dreifbýli, í fangelsum, í stríðshrjáðum löndum og í flóttamannabúðum.